#စိုတ်ဒှ်နာဲ ခန္ဓဒှ်ဍိက်တုဲ ယဝ်ရစိုတ်မွဲ ဒှ်အာသရမ္ဂးတှ်ေ သွက်သ္ဂောံဆက်ကၠောန်အာကမၠောန်ဂတဂတတေံဂှ် ပြသၞာဂၠိုၚ်လောန်ဂွံဆဵုမာန်ရ။
ခြာဟွံလအ်ဟေၚ် ချပ်တ္ၚံက် ဟီုတ္ၚံက် ထ္ၜးကမၠောန်လေဝ်တ္ၚံက်ကၠုၚ် ညံၚ်ရဴသတ်မၚ်ဂၠန်ဗွဲစၟတ်ရ၊ ဟိုတ်ဂှ်ဟေၚ် ဗွဲတၟေၚ် စိုတ်မွဲဂှ် လွဳလွတ်ပရာလဝ်ခိုဟ်ခိုဟ်တုဲ နမေတ္တာအး နစေတနာအး ဟွံရန်လဝ်ဖဵုပူဂဵုမွဲသာ်တုဲ သဗ္ဗအိုဿီုဂှ် ဒးဂံၚ်သၠးပွးမာန်အခိၚ်လဵုဟွံရုဲ ယဝ်အရာပွမပြံၚ်သၠာဲစိုပ်ကၠုၚ်ပ္ဍဲဂတမတ်ပိုဲ။
ဣဏံဂှ် ဒှ်သွက်ဂကူပိုဲ၊ ဣဏံဂှ်ဒှ်သွက်ဘာသာပိုဲ၊ ဣဏံဂှ် ဒှ်သွက်ဂကောံမၞိဟ်ပိုဲတုဲ ဒၞာဲဂွံဒှ်ယဲစိုတ် ဒၞာဲဒးဟောံစိုတ် ဒၞာဲဒးကေတ်မာန်ညးသ္ကံဂှ် မုဖဵုဟၟဲ ပ္ဍဲစက္ကဏံရ၊ ကၠောန်ဒၟံၚ်တ္ၚဲဏံဂှ် နဒဒှ်တာလျိုၚ်ဂကူမွဲညံၚ်ဂွံပြေပြံၚ်ဂှ်စှ်ေကေတ်စိုတ်အိုတ်ညိ၊ သာ်ဏံဟွံသေၚ်တှ်ေ ပံက်ဝေၚ်ဒဳထ္ၜးဝေၚ်ကသံက် ဟွံလအ်ဂွံကၠုၚ်ယဲစိုတ် မန်ထဝ်ကျာၚ်ကော်စ(ယဲစိတ္တဇ)လောဲလောဲရ။
စိုတ်ဒှ်သရတုဲ ဂံၚ်ဒက်ဂစိုတ်ကအ်ဇကုမာန်၊ စိုတ်ဒှ်သရတုဲ ဂံၚ်ပန်နကဵုလွဟ်က္ဍိုပ်ဇကုမာန်၊ စိုတ်ဒှ်သရတုဲ ဂံၚ်ကုတ်ကအ်ကောန်ဗြဴမာန်၊ စိုတ်ဒှ်သရတုဲ ဂံၚ်ဂစိုတ်ခမဳသၚ်တံမာန်၊ စိုတ်ဒှ်သရာတုဲ ဂံၚ်ဂစိုတ်မိမညးတၠဂုဏ်မာန်၊ စိုတ်ဒှ်သရတုဲ ဂံၚ်ကၠောန်ပွသရာံပါပ်မာန်၊ စိုတ်ဒှ်သရတုဲ ရံၚ်ဗဵုညးဂမၠိုၚ်တံဂှ် ဒှ်ကၠုၚ်သၞသတြုံဇကုဖအိုတ်မာန်အိုတ်ရ၊ စွံသတိညိတုဲ စိုတ်မွဲဂှ် လွဳပရာလဝ်လ္ပကဵုဒှ်အာသရအိုတ်ညိ။
#နရက်လေဝ်နွံပ္ဍဲစိုတ်ဂှ် ချပ်−ပါ်ပါဲ−ကၠိုဟ်တၟိၚုဟ်က္တဵုအိုတ်ညိ။
( ဝိညာဏ်ထဝ် − မန်ထေန် )
